鳴越 Pho

营业中

休息中

经过中环街市见到依间新开嘅越南Pho，晚市套餐$63-$82不等，奉送热饮无加一，中环价嚟讲都算合理。坐低同店员倾两句，原来餐厅系同区同名「鸣越越式料理」嘅分店，过往评价都好高，相信分店食物质素都唔会差。嗌咗最经典嘅越南生牛肉檬粉－檬粉幼身易夹，汤头够清甜，有九层搭、洋葱同葱花令味道更浓，再按自己口味加上辣椒粒同青柠汁；牛肉被热汤轻灼仍然非常粉嫩，份量亦都好多。越池猪扒本身跟饭，店员表示亦可以随意配搭粉面，所以拣埋金边粉试试。金边粉烹煮时间刚好唔会太腍，猪扒外表好吸引，食落juicy唔干柴，调味足够唔洗点辣酱已经好好味。安南手作粉卷第一次食，粉皮好似薄身嘅肠粉，入面包裹住甘笋、沙葛、木耳丝同猪肉粒，口感丰富，面头更有惹味嘅葱油同炸蒜令粉卷食落更香口。跟餐嘅香滑奶茶同平时茶记嘅差唔多，顺滑带啲苦涩，系香港人嘅口味。