101台式休閒站 (已結業)

今早要帮阿妹过中环令野，之后要赶返工。但都要医肚，系冇乜时间既关系下，决定买外卖返公司食。见到呢间咁多人排队，应该都几好挂。呢间系卖台式食品，有午市套餐选择，一个饭或面，加杯饮品，大约50-60蚊。中环呢个地方黎讲，算系平价之选。饮品都有好多选择，我拣左珍珠奶茶。平时一杯珍珠奶茶都要二十蚊，计落好抵。如果惊唔够饱，仲有小食可以叫。原本谂住简简单单叫个饭就算，点知个饭一D都唔简单。叫左个板烧鸡柳拼章鱼饼肉燥饭，喜出望外，一个饭竟然可以有四样𩠌，而且质素都唔差。饭同𩠌分开放。肉燥拌饭，不过我嫌唔够汁，所以我将d𩠌汁（卤汁）加埋落去，咁就非常入味啦。有卤蛋半只，一块章鱼饼，好多件鸡柳，仲有少量椰菜伴底。章鱼饼真系食到有章鱼粒，鸡柳好滑好淋，卤蛋好入味，整体黎讲唔错。仲有网上外卖平台服务提供，唔一定排队买外卖呀。