高木炭火鳥燒 (已結業)

自从发现棉登径有好多餐厅后，同朋友得闲就过嚟试吓唔同餐厅，呢日突然好想食串烧，于是就试试呢间餐厅。居酒屋走简约风，装修比较朴实，是晚精选写晒喺黑板上。味淋鱼干唔会烧得太干，烟烟韧韧，配埋沙律酱好滋味。 银杏又系烟烟韧韧，有佢独特嘅清香，好味。茄子又绵又多汁，酱汁只系薄薄一层涂面，唔错! 大葱鸡肉嘅鸡肉唔会嚡，有鸡味，配上大葱就更香口。大葱烧得又淋又香，好惹味。牛舌好爽，一啲都唔韧，点埋芥末酱就更鲜味。烧鳗鱼嘅鱼肉好淋好软，加上黄萝卜可助消减油腻感。鸡软骨好特别，食落有层薄薄嘅脆皮，蒜香味好重，正!鸡肝保持到软软嘅质地，唔会好柴。鸡皮简直脆到好似薯片咁，真系会食到唔停口，系邪恶之选! 芝士年糕嘅芝士好浓味，年糕微甜又烟韧。菠萝一向系我最爱，有层脆糖衣系面，唔会过甜，菠萝本身好 juicy，好食! 露笋猪肉卷嘅露笋好嫩好爽脆，薄薄嘅猪肉片好香口，加埋露笋系 perfect match! 见到师傅同熟客有倾有讲，师傅仲推介精选烧物，居酒屋就同装修一样，走亲民朴实风格。