菊一巷 (已結業)

呢间好细嘅隐世小店，开咗无几耐。一直lunch都有帮衬开外卖便当。水准惊喜，性价比极高。等lunch 时成日喺正门大玻璃见到师傅烧鸡扒，见到师傅功㗎非常认真。终于等到解除限聚令，可以嚟夜晚来试吓佢啲串烧！我冇订位，差啲无位一入去已经见到全场爆满。好彩坐到最后一张枱。感觉有居酒屋嘅热闹，播住好groovy嘅日本歌! 有阵阵烧烤嘅气味！点左一支獭祭清酒，够dry , 好配串烧！极度推介下酒小菜，紫菜白饭鱼干。见到一条一条小鱼铺咗喺紫菜上面，极香口！唐扬炸鸡沙律，炸鸡竟然食到阵阵用姜腌过嘅味，一定系自家制唔系来货。沙律新鲜脆口。厚切牛舌心串烧，真系极正，出边已经好少食到咁厚切，好入味，又唔奀。烧鸡翼老板话系日本嘅阿波尾鸡种，皮特别薄同脆，果然冇错。免治鸡棒都系极推介，食到脆脆嘅鸡软骨喺入边，点埋日本蛋黄，啖啖肉，又香又脆又滑。经理推介今日海鲜系烧北寄贝，佢哋当日晏昼会喺街市买最新鲜嘅海鲜。真系从来冇食过，北寄贝好好肉，有清酒同牛油嘅香味，一试难忘。其他嘅秋葵，芦笋，银杏，正常发挥啦。佢仲有比较少见嘅烧日本蒜头。完全冇蒜头嘅辣味，有啲似糯米粟米嘅粘糯，好特别！