香港腸粉皇 (已結業)

自从渡船角两间即拉肠粉执咗之后，一直都揾唔到一间似样嘅肠粉店！今晚误打误撞终于俾我揾到喇...因为大雨，收工后去附近嘅土瓜湾觅食，见到街边有个「布拉肠粉」嘅二拉架，但店面较细较市井。太肚饿又想轻食，所以决定一试。见到餐牌真系好有期待，除咗入面有晒以前好钟意食嘅猪润肠、梅茶猪肉肠，仲有翠瓜杂菌呢样比较少食，而且价钱唔贵，一碟都系$20左右！净系食肠粉当然唔够啦，自从北角旺记执笠之后，好耐都冇食过有水准嘅菜干粥，难得呢度都有，梗系要嗌碗试下啦；仲叫埋好多人都赞嘅蒸萝卜糕，唔理啦，由原本打算轻食变咗都叫咗唔少...粥同萝卜糕都好快到，一入口，揾返久别重逢嘅味道！菜干粥好入味，好够火喉，粥地好绵，好香好食！至于蒸萝卜糕亦好有水准，我比较钟意食实净少少，所以好啱口味！主角肠粉等咗10分钟登场，似乎真系即刻拉。个粉皮望落冇以前渡船角咁薄，但食落口都好滑，猪润够味又热辣辣，我都俾好高分！梅菜腩肉肠亦唔逊色，猪肉唔算好肥，料亦足，我觉得整体水准有85分！