Jaspas Restaurant (已結業)

今曰晏昼同同事去咗上星期已约定嘅餐厅预祝我生日，几乎两年无嚟过呢度，有点久别重逢嘅感觉。 天气又冻又落雨，真系要多谢班同事肯挨住冷雨去庆祝我生日。咁冻三个女士异口同声要热汤做头盘暖一暖，是日靓汤系蕃茄汤，蕃茄味浓可惜略酸，不过都可以接受，其他同事就拣鱿鱼沙律，鱿鱼都几大块，沙律菜都好新鲜，不过就唔适合唔钟意食西芹嘅朋友。至于主菜我地分别叫咗虾仁寛条面、羊扒同烤鸡。虾仁寛条面份量好大，女士食就多咗D，羊扒得两件，男士食又偏少。我因为好耐之前食过呢度D猪扒，觉得太硬，今次稳阵D，就拣咗我钟意嘅烤鸡，睇落卖相都唔错，食落D鸡肉都几香滑多汁，不过同餐牌个名有出入，红酒汁烤鸡伴车厘茄，个汁无红酒味之余，车厘茄只得一小粒，令人有点失望！伴莱方面，我最欣赏个小薯仔，可能加咗牛油嘅缘故，感觉好似焗薯，味道好好！ :）而其它配莱，由于烤系我钟意嘅煮法，所以有分加，但系黄椒对我嚟讲生咗D。甜品朱古力慕士球，我都几满意，有好香浓嘅朱古力味，唔太甜，份量啱啱好。......食完之后有同事话行11层楼梯返office......