惠比壽居食屋 (已結業)

好耐都无试过同肥面二人世界lu，所以就突登拣咗惠比寿食佢嘅和风三文鱼冷面。惠比寿嘅和风三文鱼冷面嘅配料就梗系唔少得三文鱼鱼生啦！另外仲会有墨鱼刺身做点缀。食嘅时候加埋沙律酱同冷面豉油，确实好好味，只可惜三文鱼冷面嘅价钱虽然无乜点样加到，但系份量就好似一次比一次少咁，无咗以前一嚟到好澎湃嘅感觉。宜家整个冷面嘅三文鱼刺身同墨鱼刺身好似好唔够咁，好彩食材方面算几新鲜，而且亦都好够冻。是晚除咗点咗冷面外，仲叫咗个推介嘅串烧黑豚肉。嚟嘅时候见到啲肉肉白雪雪咁，但系食落又出奇哋够味，而且肉质真系好靓，好滑，相当有惊喜！可以encore嘅！另外仲叫咗串烧盐烧牛舌，虽然望落去有好多黑椒同盐，但系食落唔会觉得好咸，牛舌本身亦相当出色，味道非常浓郁。唯一不足嘅可能系比较薄切，所以系送到嚟嘅时候如果唔快手啲食，就会好快冻晒！最后，我哋仲叫咗款牛肉炒北海道拉面。拉面嚟到时我哋先知原来系鐡板上嘅，不过系怕有少少热气之外，都无乜问题。拉面嘅份量比预期中为多，惹味得嚟又颇为香，牛肉嘅质地亦都唔错，唔会太老身。整个拉面可谓色香味俱全。是晚晚饭大体都为满意嘅，唯独店内嘅所有员工都好似啱啱瞓醒咁，无一个系好笑容啲嘅！