La Kaffa (已結業)

星期六，瞓到自然醒，就想食个 brunch。落雨天，近近地，就去迎海商场试新嘢。一个人揾食，有呢D自闭位就最正，食得自在。面对迎海内园景，感觉都唔错。内部环境都企理，平日人少D应该仲休闲。之前有网友介绍呢度有我至爱嘅 egg benedict，一于叫嚟试吓。egg benedict 餐包饮品$49，改叫特色咖啡就原价减$8，有得拣，就拣咗杯夏威夷果仁咖啡。咖啡甜味适中，唔驶加糖，但又唔会太甜。egg benedict 造得唔错，有惊喜。侍应哥哥特登放返上图咁样，蛋面向我，令 presentation 同感觉都好好多。egg benedict 有水准，唔会熟得制，又唔会好似太阳蛋咁就算。暖暖地嘅蛋，加上酱汁，带点点香草味，但无其他厅成日都过重嘅醋味。抵赞嘅系配菜粟米同茄汁豆都系暖架，唔系一般咁涷冰冰！其实一份餐已经够食，不过听网友话egg benedict 唔够饱，所以落单时叫埋份避风塘鱿鱼圈。鱿鱼圈炸得热辣辣，但“避风塘”个名可能误导咗我，我本 expect 会辣辣地，点知无咩味。点嘅酱都无咩味。如果配个酸辣酱，应该美味好多！整体嚟讲，都系一个可以叹口咖啡，休养生息嘅好地方。