一口和味 (已結業)

Item: 一口和味
Rating: 4
Author: 姚东师傅

13 食记

味道

环境

服务

卫生

抵食

元朗

$50以下

铁板烧串烧小食店串烧店

姚东师傅

等级4

962

不经不觉, 师傅都有好一段时间冇单独和好友食家"乜都放入窿"食饭, 冇办法啦, 呢期大家各有各忙, 各有目标嘛! 不过最近好友靓仔正哥, 大只佬和酒吧老板联手创业, 开食店, 仲要拣左喺元朗呢个地方扎根! 呢个地方话晒都系师傅半个地头, 加上师傅和好友食家"乜都放入窿"作为佢地嘅老死, 冇可能唔撑, 于是昨天亦搅左个乜东饭局之一口和味!

先至声名, 虽然师傅和食店东主属好友关系, 不过师傅绝对会凭良心报导真相, 保证呢个食评系公正的, 绝经得起考验! 闲话休提, 昨晚大约七时和好友食家"乜都放入窿"由九龙出发, 齐齐搭公车入去, 呢个时间都入去, 就足见师傅和好友食家"乜都放入窿"系几咁有“刻”呢, 大约一个钟到嘅车程就到达目的地, 落车沿著地址搜寻, 好容易就揾到间食店!

由于事前没有向东主透露半句, 绝对系突击, 所以去到食店亦未见到任何一位老板! 其实在食店门外, 已经见到人亦唔算多, 直头可以用小猫三只黎形容! 如果平时见到咁嘅场面, 师傅肯定却步, 但由于是次系专诚入黎, 所以绝对冇脚软, 于是和好友食家"乜都放入窿"咁入黎照行入食店!

入到去食店, 望下张柯打纸, 都有几多唔同选择, 于是亦询问下店员有咩推介, 再和好友食家"乜都放入窿"商量后, 就一口气柯打左以下食物! 秘制劲辣鱼蛋一串, 秘制炸烧卖一串, 板烧神秘牛仔骨两份, 炸芝士年糕一份, 烧牛舌两串, 烧免治鸡肉棒两串, 炸芝士鸡卷一份, 板烧黄芥辣猪下青一份, 铁板饺子(泡菜)一份和板烧香草羊架两件!

落完单等一阵就有得食, 而最先登场的系大家都应该估到系秘制劲辣鱼蛋同埋秘制炸烧卖! 先讲下秘制劲辣鱼蛋, 鱼蛋体积属细细粒型, 虽然系细粒, 不过入口都几弹牙, 绝不粉口, 加上秘制咖哩酱香香辣辣, 而且辣嘅程度合乎师傅嘅口味, 绝对系惹味𠮶种, 劲正呀, 食得辣嘅绝对要一试; 至于秘制炸烧卖真系炸得好脆, 而鱼肉身亦唔会有太韧和太胶嘅感觉, 炸左后亦有少少鱼肉嘅香味, 再配上秘制咖哩酱, 非常之正!

之后嘅食物亦陆续登场, 先讲下板烧神秘牛仔骨, 牛仔骨属于半肥瘦, 肉质非常松软, 绝不韧身, 加上烧得香时牛仔骨亦带出少少牛味, 真的非常吸引, 而且调味洽到好处, 绝对系必食之选! 炸芝士年糕一份有三只, 外面炸得脆, 而内里嘅年糕烟烟韧韧, 配上芝士甚香, 香而不腻, 加上芝都有少少流心嘅效果, 真的不错! 炸芝士鸡卷亦炸得好脆, 不过呢个芝士味就欠奉, 幸好馅料内不太干身, 但师傅就觉得冇咩特别!

再黎就系烧牛舌, 牛舌算系属于几厚身, 咬了一口后, 发觉口感一流, 皆因牛舌系爽口中带松, 软绵绵嘅感觉好正, 味道非常讨好, 如果呢油能再少啲, 相信会更加吸引, 不过呢一刻嘅牛舌已令师傅欲罢不能, 另一必食推介! 师傅另一个至爱就系烧免治鸡肉棒, 起初还以为系就咁免治鸡肉, 馅料里求其摆几粒洋葱, 点知入口后发现馅料除免治鸡肉外, 还捞埋了鸡软骨, 呢个鸡软骨真系不得了, 令到个烧免治鸡肉棒入口除左松之外, 仲有一种清爽口嘅感觉, 好似加左马蒂咁, 不过就比马蒂干身, 加上爽口得黎绝不硬, 唔会令到牙肉受伤或受损, 呢个烧免治鸡肉棒绝对系必食之选, 师傅大力推介!

板烧香草羊架亦系师傅另一推介, 羊架嘅“嘥屎”都几大件, 而且烧得好香, 肉质松软而味道香酥, 揸住条骨黎食, 系另有一番风味, 加上只卖两草野一件, 绝对系大件夹抵食, 嗜羊者不能错过! 板烧黄芥辣猪下青就比较特别, 猪下青即系猪颈肉, 肉身爽口绝对唔干身亦唔硬, 擦上黄芥辣亦唔太攻鼻, 师傅就算唔太钟意食芥辣亦接受到, 想试新野应该要试呢个! 最后系铁板饺子(泡菜), 一客有三只, 饺子皮脆而不硬, 馅料带微辣, 不过略嫌咸少少, 呢个较为普通!

食左咁多野后, 当然一定要试埋呢度嘅一口炸雪糕, 一份有三粒, 入口觉得皮脆, 但厚身, 细看下才知原来系雪糕糯米慈, 唔怪之厚身啦, 不过外热内冻又真系几得意, 呢个一口炸雪糕绝对值得一试!

总括黎讲食物质素不俗, 有惊喜, 店内环境唔算大, 不过就干净清洁, 而店员亦服务有礼, 价钱就非常相宜, 食左咁多野, 每人都系一百一十元正, 但就食到师傅和好友食家"乜都放入窿"劲饱, 非常抵食! 师傅同好友食家"乜都放入窿"呢个乜东饭局之一口和味真系几和味, 唔计私人因素都肯定会有下次, 笑脸系值得一比! 呢一刻师傅张枱面已经湿晒, 皆因一想起烧免治鸡肉棒就已经不停流口水了!