帕維亞意大利餐廳

营业中

休息中

九龙城最岀名应该系佢嘅泰国菜同潮州菜，两样我都好钟意食，不过九龙城将会大规模重建，咁就趁佢重建之前试多几间餐厅，今日呢一站就系呢间叫Pavia嘅意大利餐厅。唔知食咩好问咗职员有咩推荐，佢介绍我哋每人叫个Set Lunch，套餐包餐汤或沙律同埋一份主菜，咁我哋叫咗一人一份套餐，另外再加多份意大利云呑。餐汤同沙律我哋一人要咗一样，沙律系蜜桃鸭胸沙律，沙律同酱汁分开上，个醋汁酸酸哋食落相当开胃。餐汤系姜汁甘荀汤，我咁大个人未饮过姜汁汤，味道又岀奇地夹。另外前菜会跟埋四片蒜蓉包，冇乜咩特别不过胜在够热。成餐最贵嘅就系呢碟云呑，仲贵过主菜，个云呑比较特别之处系佢只馅，一般意大利云呑都会用肉类或者蔬菜加芝士做馅，餐厅用咗带子同菇做馅，而且都相当足料，酱汁亦都非常香浓，唯一缺点就系真系有啲贵。主菜叫咗西冷扒同猪扒，两款嘅配菜一样，牛肉跟黑椒汁猪扒跟醋汁，两款肉都唔会好硬，虽然我平时钟意食牛扒多啲不过今次我会投猪扒一票，佢只醋汁唔系成日见到，我觉得同猪扒非常夹。可以加钱要埋个甜品不过太饱冇叫到，总结而言水准都几好，如果经过九龙城又唔想食泰国潮州菜可以考虑一下呢间。