Six Tea (已結業)

个仔比卡猪病咗成个星期，冇得周围去玩，费事传染人，今日好返9成，梗系要同佢放电啦，马鞍山公园系好线嘅地方，玩完行返去攞车，见到呢间门口贴咗张广告系雪糕鸡蛋仔，咁咪比卡猪两样最钟意嘅食物二合为一啰，佢望住张相两眼发哂光，试吓佢先!我地叫咗焦糖咖啡曲奇雪糕，鸡蛋仔即叫即整热辣辣，配上冰冻雪糕，都几得意，雪糕上面仲有一球忌廉同珍珠，咁样加埋雪糕嚟食真系好开心；比卡猪食到唔停得口，连我地叫咗嘅烧卖、牛肉球都唔吼，咁唯有两公婆啪哂啦，鱼肉烧卖食得出来货唔错，我都成日食呢个味道；呢度牛肉球有样出面唔系成日有嘅，就系李派林喼汁，绝配，咁样个牛肉球未算最出色都加分；食完太座话口渴想饮嘢，呢度都有好多款饮品选择，我地叫咗水果白桃茶同焙茶芝士奶盖茶，比起街外嘅口感，呢度冇外面咁甜，所以大家唔使叫少甜都可以了，回程比卡猪已经话再嚟再嚟雪糕鸡蛋仔!哈哈!