Opa Mediterranean Bar and Bistro (已結業)

今日约咗朋友喺尖沙咀呢间Opa Mediterranean Bar and Bistro倾吓偈叙吓旧。原来呢度嘅Lunch Menu几抵食。叫咗2个lunch set，Soup of the Day系蕃茄汤，店员会喺客人面前倒汤，蕃茄汤嘅味道比较酸，可以令人更加开胃。另外嘅地中海凯撒沙律配烤鸡份量都唔少，上面仲洒上好多芝士碎，罗马生菜爽口，烤鸡都好嫩滑。另外有两款头盘，意式烟三文鱼切片拌以沙律菜，不过烟三文鱼就反客为主，味道就更加突出。另外嘅蕃茄红莓意式烤面包就相当有惊喜，烤多士上放上蕃茄粒、红莓干、芝士、香草等，再淋上黑醋汁，整体又香又脆。香煎纽西兰西冷牛扒配浓牛肉烧汁嘅西冷牛扒都相当厚切，而且都有肉味。牛扒之下有蔬菜同薯蓉，薯蓉混入牛肉汁之后就更香更滑。另外嘅香草酱烤鸡意粉带有辣味，而烤鸡更加系大大块。最后甜品系西班牙油条，与其话系油条，不如话佢似港式嘅莎翁，外面沾有砂糖，旁边就有朱古力酱同士多啤梨酱，配埋新鲜生果，味道唔错。另外嘅香蕉麻糬都系一道特别嘅菜式，忌廉包住脆糖，上面再加入香蕉等生果，味道充满特色，不过就相对较甜。