人間世茶會館 (已結業)

即系咁，我住又住观塘，返工又返观塘，都深明观塘系一个人多车多尘多既地方，但唔好以为响呢区揾食就一定逼逼狭狭有气无椗透，只要你识揾，一样可以揾到世外桃源！ 讲紧既系位于观塘工业区，骏业街既「人间世茶会馆」，呢度系一间茶馆，但都一样有饭食。食饭价钱唔平 (食素约$138，食荤约$158)，而且唔包饮品，但餐厅可以俾你一个好静局既环境，舒舒服服咁叹足一个下午，都算物有所值。(记住，12岁以下小童恕不招待。) 茶馆地方颇大，有用餐既地方之余，更有出售茶具既位置；装修好有京都风格，枱面上更放置左绿色植物，优雅宁谧。 广岛蚝意大利饭 ($158)广岛蚝胀卜卜，够creamy，外层煎得香口；意大利饭奶味浓郁，软硬适中，唔错。 冬荫公大虾意粉 ($158)一上枱已经闻到大虾既独有香气，烧得好香，虾肉鲜甜弹牙；意粉用泰式冬荫公cross over西式忌廉汁，酸辣中带奶香，水准之作。 台湾果茶 ($50)餐厅有offer免费水，但既然黎到茶馆，又点可以唔试下饮茶？点左呢款台湾果茶，用干果冲泡而成，酸咪咪，好开胃，食完饭消滞最啱。