基隆茶餐廳

营业中

休息中

知道呢间茶记老板的故事后，专程去太子食晏支持。推门内进，见到长者、学生哥、写字楼人、露两点大只男，同埋拖住仔女的师奶，唔少人食紧是日午餐蒸肉饼、扬州炒饭、芝麻鸡饭同焗猪扒饭。碟碟份量足，焗猪卖相唔错。为咗满足食炒面的小愿望，叫咗干炒猪扒意加热奶茶。帮手落单的侍应系中年大叔，佢好有礼貌，冇粗声粗气，仲会同客人讲唔该！呢度的楼面都系中年人士，落单会慢啲啲；将 A 枱的食物送咗去 B 枱，当发现搞错，会同客 say sorry ；人多亦唔会赶客。间中同熟客仔讲两句互动，有熟客一坐低就自动波叫照旧，街坊人情味就喺间舖飘吓飘吓咁。热奶茶唔系用厚身耳仔杯改用玻璃杯，有少少失望。茶味较淡，适合喜欢淡口的朋友。主角干炒猪扒意粉料多，猪扒有八小块，全肉的同连骨的都有，食落唔系香口脆炸𠮶只，有啲肉质好硬，有啲又啱啱好。意粉炒得好有镬气，阵镬气闻到又食到。意粉喺碎咗啲，但唔喺林到入口即溶；洋葱丝唔生，系有花时间炒过，夹埋芽菜同意粉食好正。油唔多，碟底冇一氹油。开动后想加辣，见枱面个调味盘好骨子兼整洁，筷子同汤匙放喺枱面有盖胶盒内自取，卫生过上巿𠮶间好多。