曾記粿品

营业中

休息中

阿妹上次已经嚟食过一次，仲带咗外卖返屋企，有韭菜粿、芋头粿、椰菜粿俾我，三种粿都系儿时回忆中的美好，失传左嘅潮州味道。阿妹听日搭飞机走，所以特登再嚟返桌，顺便买外卖运到加拿大。一嚟到见到老板，即刻同佢打招呼，老板都好热情，因为上次食过蚝饼，老板就介绍试吓水瓜烙，仲叫咗潮州炒粿，同埋韭菜饼。先嚟水瓜烙，一吃入口，不得了，有虾肉嘅鲜味，水瓜嘅清甜，仲有桩菜嘅咸香，入面仲加咗猪肉，多重味道，煎到又香脆、又烟靭，一试难忘。蚝饼都冇失礼，蚝仔非常新鲜，超正。潮州炒粿略嫌甜味重啲，但系都好有特色。食到咁上下，老板又过嚟招呼，问吓我哋要唔要饮茶，亲自争加左热茶拎埋嚟，仲话不如试吓牛丸，牛丸系一定要试，相信啲牛丸系佢哋自己打嘅，有牛肉嘅香味，汤底又冇味精，所以做到鲜香弹牙。最后食埋个清心丸绿豆爽白果，真系甜蜜嘅句号。临走话要买埋外卖，因为知道阿妹要带返加拿大慰藉屋企𠮶「架己冷」，老板又亲自拣啲靓嘅冇穿嘅潮州粿俾我哋，再教我哋如果返到去要搭飞机，唔使放入冰格，放入雪柜冷藏，再加个雪种冰袋保持温度，带到过去可以放一两日。呢间曾记粿品，食品味道已经一流，更难得系体会到香港越来越少见嘅人情味。