泰地道 (已結業)

师傅自从试过呢间食店泰国菜后, 就念念不忘, 终于早几星期前就再黎呢间食店, 希望能够好好叹番餐, 可惜事与愿违!两个人冇订位入到去, 由于唔多人, 所以即刻有位! 一坐底即刻睇下有咩好食, 最后商量一阵决定要炒金边粉, 泰式猪颈肉同咖哩牛筋腩!金边粉同印象中嘅卖相好似唔同左, 一望埋去师傅觉得有少少倒胃, 不过试下个味道并唔系太差, 金边粉依然系烟烟韧韧, 炒得唔油, 师傅觉得勉强合格啦; 泰式猪颈肉烧得好香而且切得好薄, 不过猪颈肉就油左d, 烧得未够干身, 而肉身望冇咁靓, 比上次黎食真系差左唔少, 几失望; 咖哩牛筋腩嘅咖哩就非常香, 加上带少少辣, 绝对唔错, 而牛筋腩就够松够入味, 真系唔错; 师傅都忍唔住叫多碗白饭呀!总括而言食物质素相退步左, 服务态度唔错, 环境舒服, 埋单两旧水到, 价钱都算抵食; 师傅觉得质素真系今非昔比, 可能师傅要求高左, 又可能真系成本上涨, 令到质料又差少少, 间接令师傅有少少失望, 笑脸真系比唔到喇, 仲会唔会再黎呢? 真系未知数!