川上龍 (已結業)

第一次嚟到试川上龙，环境装修都唔错，加上有一扇窗嘅街外景，树影婆娑，喺晴朗嘅下午，都算赏心乐事，呢度嘅服务普普通通，嘢食总体来讲都算有水准，不过亦有佢嘅瑕疵，佢嘅价钱我哋应该要求高一啲，所以，如果好似我今次有半价优惠，就不妨试下。桂花茶茶位$10/位，奉上嘅桂花茶，香浓味甘，值回票价。夫妻肺片其实系麻辣牛肺和牛脷，麻辣程度相当入脷入肺，相比起其他店子嘅薄切夫妻肺片，呢用厚切牛肺薄切牛脷，组合几新鲜，口感几好。川上龙招牌鸡煲半只鸡嚟讲，份量几多，仲俾个电磁炉我，边加热边食，相当正，鸡肉好滑，不过味道无预期中咁浓，辣度属小辣，里面加左年糕，有惊喜，年糕软熟但唔够烟韧，整体仍算好味，酱汁稍浓些少就完美。口水鸡丝冷面麻酱味浓，冷面唔够弹牙，随面附上辣酱一碟，照顾食辣同唔食辣嘅人，够细心。炸脆鳝脆鳝表面嘅黑醋汁做得唔错，不过炸得唔够脆，相信鳝肉喺炸之前整得唔够干身，于是就咁扑粉去炸，最后脆鳝出来变咗系韧鳝，味道系好，脆口欠奉，都算系失败之作。