蘭苑饎館

营业中

休息中

久唔久就会想去「兰苑」食饭，因为佢d汤好饮，d𩠌以蒸及煲为主，煲系可以自由组合材料，无咩味精之余，煮法亦比较用煎、炸更为健康，所以食完几舒服。帮趁左佢好几年，虽然价钱都一路加，但难得水平仍然算系保持到。以前多数见老板坐阵，近年就佢个仔(估计)开始坐阵，餐厅亦开始少少与时并进，见到有Facebook page，招呼亦比以前殷勤左。顺带一提，呢度d龟苓膏几出名(不过我就未试过)，佢的甜品亦唔错，尤其系膏类，可以留意下。呢晚叫左两个套餐，分别系「客家豆腐」同「白切鸡」，套餐包「例汤」、油菜」，「粉面或饭」(任添)。例汤差唔多每日唔同，而佢d汤真系几好饮，汤渣都唔错，但细碗d。呢度d鸡好快卖晒，所以想食鸡要早少少黎。「白切鸡」皮系属于少少厚身带脂肪果种，皮骨比例得宜，鸡肉亦算滑，有鸡味，唔会渗血水，点埋自家制葱油姜蓉一齐食，非常唔错。「客家豆腐」豆腐豆味浓，虽未至于好滑身，但食落好有一份实在感，吸收埋豆腐面猪肉球的肉汁精华，配合咸甜度适中的豉油汁，亦唔会谁抢了谁风头，令人回味。豆腐面猪肉球有马蹄碎，味带甜鲜，口感结实中有爽脆，甚有层次。虽然可以选饭面粉，不过我通常都会要饭，配搭蒸𩠌比较对胃口。