牛魔 (已結業)

其实一直想试牛魔，但每次都好多人排队，同太座去尖沙咀，经过棉登径见到牛魔，碰啱中午刚刚开门，于是即刻入去食个晏先！间格宽敞，冇挤迫感，装修得唔错几有格调，职员态度友善，又会细心介绍餐牌食物，抵赞！一人拣一款套餐，可以试多几种唔同嘅肉类，先嚟几个前菜有牛骨汤、沙律同埋中华海草，喺食肉之前先打打底平均吓！A餐烧肉自选定食（七款盛）有豚肉五花薄切和厚切，澳洲和牛嘅牛舌、胸腹、肩肉，黑毛猪颈肉同埋酱油鸡髀肉，店员特登提醒鸡髀肉要摆喺炉边烧，因为较易㶶！B餐牛魔烧肉盛合有澳洲和牛西冷、胸腹同五花，A4和牛霜降，厚切和牛舌、肩肉！原本嘅白饭我地改咗做“牛魔拌饭”，多咗紫菜碎食落多咗层次感！饮品叫咗柑桔特饮同菠萝特饮，都几开胃解渴！睇落以为样样得几件，其实份量好足够，而且肉汁丰溢又好味道，而且个炉火烧肉唔会太猛，总括嚟讲性价比高，下次会继续帮衬！