LAVA (已結業)

金巴利道呢边都几多嘢食，除咗街铺之外楼上铺都有好多选择，今次就嚟呢间楼上嘅西餐厅 食我好钟意食嘅西班牙菜。环境好大好阔落，而且一入到去就有一个超大嘅酒吧，昏暗嘅环境好适合约会！《蟹肉奄列》$98蟹肉同蛋系一个绝配，基本上系必食。蛋超厚，包住好多新鲜嘅蟹肉，好满足！《西班牙猪牛迷你汉堡包》$88迷你汉堡包啱晒啲比较细食嘅人士，虽然份量唔大但系非常精致，中间仲有吹卜卜嘅物体，好脆口口感好好，而且牛肉猪肉咬落都弹牙，整体来讲口感好好。《马萨拉炸鸡髀仔》$88呢个鸡髀仔炸得非常香脆，但系食落唔会好干，仲系充满肉汁！点埋薄荷酱食就啱啱好，少少清新嘅感觉，增加个层次。《螺丝意粉》$138罗勒酱系我其中一款好钟意嘅意粉酱，呢个意粉食到好浓郁嘅罗勒味道，而且仲有唔少嘅蔬菜混合左喺入面，好味得来又非常健康。螺丝粉煮得啱啱好，唔会好林，口感真系几好。最后就到甜品！我哋嗌咗西班牙油炸鬼波配朱古力雪糕，油炸鬼外脆内软，唔会好厚粉，配埋朱古力雪糕真系好好味。