京都一の傳

日本真系永远一个去唔厌嘅地方，喺香港隔两三个月就已经好挂住日本，喺尖沙咀海港城行街无意中发现到一间好有日本感觉嘅餐厅，环境超舒服，寿喜锅价钱亦好合理，二人份量$800有找。带埋小朋友一齐出去食，只系叫多咗两份小食三个人都食得好满足。炸虾天妇罗新鲜炸起，估唔到有五只大虾咁多，烧牛舌亦都非常入味，厚切嘅牛舌好有口感，好好味。套餐我哋叫咗鸡白汤，鸡汤非常浓郁，而且好有鸡味，未开始食嘢之前先饮两碗，正啊！套餐有齐有豚肉同牛肉，连肉丸全部质素都好高，牛肉见到油脂分布平均，已经知道一定好味，但估唔到豚肉非常有惊喜，一啲都唔韧，而且好有猪味。最后套餐仲有大量蔬菜，同埋乌冬，最后仲有浓郁嘅绿茶雪糕，如果两个人食真系好饱，今餐真系非常满足。