Plato Cafe & Bistro (吳松街)

搭完高铁返到嚟，谂住拣啲西式嘢食吓，见到呢一间比较夜收工，喺高铁站行大概10分钟就到，就一于试吓。虽然有订枱，但系都等咗个零字到先入座。侍应见我哋多行李都特登俾个大啲嘅位我哋放。服侍都几周到。我哋当日拣咗卡邦尼意粉、两款意大利饭同佢哋嘅菠萝牛肉汉堡。价钱反映食材质素，卡邦尼意粉用嘅烟肉系普通嘅烟肉，唔系guanciale，就系争紧啲咸香。好彩厨师技术可以搭救，意大利粉软硬适中。而饭我哋拣咗黑松露带子意大利饭同埋西班牙海鲜饭。都系𠮶句价钱反映食材质素，并冇原粒带子，而系一粒带子切开咗三四份，碎上。我宁愿你原粒带子放上嚟都好过碎上扮好多。好彩厨师嘅技术亦都成功拯救到我对佢嘅期望，意大利饭软硬适中，唔会太腍、太水。 斋讲意大利饭嘅话算系中上水平，但配料方面要谂下。个菠萝牛肉汉堡配薯条几有新意，食落菠萝嘅酸味好衬𠮶个充满肉汁嘅汉堡，令到成个汉堡冇咁腻，食晒成个汉堡仲有胃口食甜品🤣🤣。甜品方面，我哋挨咗朱古力心太软配雪糕，同埋开心果Tiramisu。雪糕质素有待提升其他都不过不失。