渝痴漁醉

营业中

休息中

见网上评价甚高，咁啱今晚有老细，即刻谂到上去试下。可能我哋去得早，又系闲日，唔需排队即刻入得。每人128文，满四人仲可以拣多个鸡煲，加多十文仲可以上多两碟牛肉，正，唔需讲嘢即刻开食。条鱼一上枱，即刻打左个突，点解闻唔到𠮶阵攻鼻嘅麻辣味，一滚即刻夹块鱼肉试下，D鱼肉都算滑，不过就真系冇乜鱼味同埋麻辣味，唔通我呢排口味重咗😂问下D朋友，都系同样嘅感受。可能真系习惯咗深圳𠮶啲烤鱼味，未封关前𠮶半年，真系超钟意食烤鱼，一星期起码食两至三次，而家呢条鱼真系冇乜食欲，唉，算数，仲有香辣啤酒鸡。整鸡煲加啤酒真系好鬼正，当年喺公司整鸡煲食一定落啤酒，次次D鸡俾人抢哂，剩返D配菜，三条友一只半冰鲜鸡都唔够食，近期D人脚唔啱先冇乜煮嘢食。个鸡煲一上即刻有中伏嘅感觉，第一，又系闻唔到咩香辣味；第二，兜嘢黑蚊蚊，师傅落老抽咪手震；第三，D鸡肉好嚡，一D都唔滑。好在两碟牛肉味道ok,加多两罐啤酒入去拾下拾下又几滑，卒之即刻清哂。全场最有惊喜嘅系只啤酒，饮完口度有D甜味🤣另外任食𠮶D配菜入边只鱼片都算可以，加返烤鱼个汤底度感觉比条鱼好食。最后总结一下，价钱系抵，环境尚可，味道就真系麻麻，管饱就可以。