韓牛牧場 (已結業)

朋友推介我去呢间韩牛牧场，贪呢度喺铜锣湾中心地带得嚟又唔难揾位。自助区有好多特色冷盘，无论系韩式嘅渍物，定系日式嘅冷盘，都同样咁精彩缤纷。饮品都包罗万有，有齐汽水啤酒无糖饮品。呢度部份食物系指定份量，2人份嘅6色刺身拼盘相当丰富，有三文鱼腩、鱿鱼、䲞鱼、北寄贝等，新鲜又好味。四合海鲜拼盘有虾、墨鱼、扇贝同青口，烧海鲜认真一流。安格斯肉眼扒够肉味，完全唔使点酱汁都咁香口。另外都叫咗好多唔同款式嘅牛肉，全部都系可以追加，烧烤边款都咁好味。餐枱上嘅垫枱纸就有说明唔同种类嘅食物需要烧烤嘅时间，呢个烧烤炉方便快熟得嚟又容易控制火候，搞到我想买返个炉返屋企。韩式辣炒年糕味道偏辣，不过辣得嚟又几好味。炸紫心香芋丸入面嘅芋蓉又香又滑，钟意食香芋嘅我不停追加。和风炒杂菜炒得够镬气，调味亦都做得好好，唔会过咸。最后梗系要食返个甜品，韩式雪条都有好几款，食埋真系够晒满足。