嚐越 (已結業)

OT到九點，好肚餓，黎左德福食野。睇左陣餐牌，越南野幾吸引喎，就食呢間啦。坐低就送上水同餐牌，再慢慢揀下先。點左青檸疏打同咸檸檬疏打，夠汽夠凍又夠味，解渴！點左好多人讚嘅炸軟殼蟹，又真係幾正喎，大碟又唔算好油，最正係用左咸蛋黃去炸，咸咸地又脆又香口，同事連所有炸粒都食哂囉。炭燒豬頸肉，呢個又係無得輸，燒得外脆肉嫩，肥美滿油脂，滿足哂口感。香茅豬扒凍檬，豬扒略肥，但都煎得香口同香茅味十足。鍾意食凍檬為的係個支魚露汁，酸酸咸咸好正，落到好似湯檬咁，哈哈，我地有飲哂啲汁無浪費㗎。有霸氣嘅原個菠蘿海鮮炒飯！擺到滿滿的，炒得乾身又均勻，入面有魷魚，帶子，蝦等海鮮，同粒粒菠蘿肉同炒，甜甜酸酸好開胃。最後梗系要食埋甜品啦，芒果黑糯米飯，整成心形幾靚喎，糯米夠煙韌，芒果甜甜地，好食，但椰醬再多啲啲更好！一人大概二百五，實在有點少貴，不過咁好味都抵食吖。