嚐越 (已結業)

OT到九点，好肚饿，黎左德福食野。睇左阵餐牌，越南野几吸引㖞，就食呢间啦。坐低就送上水同餐牌，再慢慢拣下先。点左青柠疏打同咸柠檬疏打，够汽够冻又够味，解渴！点左好多人赞嘅炸软壳蟹，又真系几正㖞，大碟又唔算好油，最正系用左咸蛋黄去炸，咸咸地又脆又香口，同事连所有炸粒都食哂啰。炭烧猪颈肉，呢个又系无得输，烧得外脆肉嫩，肥美满油脂，满足哂口感。香茅猪扒冻檬，猪扒略肥，但都煎得香口同香茅味十足。钟意食冻檬为的系个支鱼露汁，酸酸咸咸好正，落到好似汤檬咁，哈哈，我地有饮哂啲汁无浪费㗎。有霸气嘅原个菠萝海鲜炒饭！摆到满满的，炒得干身又均匀，入面有鱿鱼，带子，虾等海鲜，同粒粒菠萝肉同炒，甜甜酸酸好开胃。最后梗系要食埋甜品啦，芒果黑糯米饭，整成心形几靓㖞，糯米够烟韧，芒果甜甜地，好食，但椰酱再多啲啲更好！一人大概二百五，实在有点少贵，不过咁好味都抵食吖。