名廚小館 (已結業)

首先因为同朋友食个快饭,所以呢张相真系好求其咁影,自己睇番都接受唔到.返番正题,嚟呢度真系要多少少老友先得,今次一行三人叫咗五个𩠌,真系好饱呀!去𩠌!!黑醋炸蛋鸡呢度只鸡出名,整咗半只,肉微暖,食落有少少黑醋味,甜味相对比较重,但绝对唔过笼,肉身都冇浸到好老,几特别嘅一个𩠌。跟住几个都系香口嘢麦片黄金海中虾,其实我唔系太好麦片呢家嘢,所以一直都好少叫呢类型𩠌,今次食过,又几好㖞,麦片甜甜地,沾满晒啲虾,虾肉可以接受,爽就唔爽但就又未至于梅,收得你钱又比番个量你。椒盐鲜鱿炸得唔错,炸浆薄薄地,鱿鱼唔老,香口。九肚鱼又系炸,类似椒盐鲜鱿嘅炸浆,食法差不多,但感觉冇鲜鱿咁好,两个一齐食就有个口感既比较,鲜鱿可以咬吓,所以建议两个只点一个.啫啫菜又系重口味𩠌一个,送到上枱,当然阵阵香味扑鼻,呢个𩠌基本上都唔会点输,食落都冇过咸。店舖就真系唔光鲜,某啲位仲会滴水,但如果装修好啲就可能贵番啲,所以睇吓各位嘅喜好喇。