普光齋

营业中

休息中

寻日星期二经过弥敦道，见到普光斋，都有多年未曾食过斋，一于试吓帮衬老斋铺。虽然快下午四点钟，店舖楼下坐满八成左右客人，斋舖都有下午茶餐优惠，所以叫咗个下午茶套餐，再多叫一碟斋卤味拼盘。斋拼盘斋叉烧质地好实，颜色红当当微甜，口感不太接受。斋鸭肾质地有咬口，甜甜地似咬一旧硬粉团嘅感觉，味道都系略甜。咖喱斋只带咖喱香味，软腍度较为挺身，口感都可以。圆形斋鸡就腍腍软滑，似食德国Frankfurter香肠，味道清淡。甜酸斋软腍腍，适量甜甜酸酸非常易入口，系我最喜欢嘅一种。豉油斋味道稍淡，烟烟韧韧，口感同甜酸斋非常相似。素鹅稍为煎炸个皮面，质地烟靭味道浓郁，比较好食兼有特色。罗汉斋炒面就只有炸过嘅面，炸面好韧又襟𡁻而且有少少脆脆口，冬菇腍身好味，冬菇木耳同草菇味道略为清淡，整体好一般。萝卜糕粉多糊口，食到最后𠮶块终于俾我食到有几粒萝卜粒。斋店装修似去返70年代嘅时空，枱凳摆设空间较为狭窄，碗筷杯碟及店面清洁整齐，店员服务态度殷勤尽力，对顾客非常有礼貌。并且留意到佢哋有派免费饭盒比街坊，值得一赞！虽然食物水准质素一般，有机会我都会再去帮衬佢哋。