One More Hotpot 來一鍋 (已結業)

虽然天气仲喺有啲热，但踏入9月初秋嘅时分，打边炉铺瘾又走返晒出黎，所以上星期我约咗朋友，一齐「来一锅」，一边烚下烚下，一边吹水讲下近况。来一锅系正鹅颈桥隔离, 系时代广场行过去都几近。打边炉几怕去啲又迫又窄嘅地方打，行出行入唔方便而惊整到啲野食，而来一锅好在环境阔落，张枱都大，叫成枱野食都够位摆 (重点: 厕所都好干净, 唔似一般任食店 shrug)。来一锅算系半任食火锅店, 提供咗药膳锅及海鲜锅两款火锅套餐以及10款唔同汤底。我地拣咗海鲜锅配合花胶螺头鸡锅浓汤汤底。佢个火锅汤好足料，花胶同鸡件数目超出想像，而且好够味，最后我地忍唔住饮咗好几碗。跟住汤底先上嘅，有安格斯牛肉，超长嘅即炸响铃同鱼皮。安格斯牛肉带有丰富脂肪，烚一烚食落去入口即化。而炸响铃同鱼片有手臂咁长，渌完仲脆卜卜，仲有好浓厚嘅花胶鸡味，正!重点出场，海鲜拼盘!!! 拼盘有大虾、贵妃蚌、象拔蚌、生蚝、扇贝同鲍鱼，数量可以拍得住主打海鲜锅嘅铺头，而且食落去好新鲜，大满足!我地仲食咗佢地手工制作嘅三宝丸、饺子，仲有啲任食火锅配料。手打丸弹牙但可惜细粒咗啲，火锅配料虽然任食但都有鸭血、冰豆腐呢啲特别野，令到我地有啲喜出望外。