錦成牛什粉麵茶餐廳 (已結業)

依个舖位旧时租俾另一间茶餐厅,晚上一般都有7, 8枱客.自从转租俾依间茶仔之后,感觉上生意比之前果间仲差左.单睇舖头名,再加上舖头外面既座地牌都系推销粉面餐,会令人以为系净食牛腩河,水饺面果种舖头,其实依度一样有小菜.店内既装修格局同上一手茶餐厅一样咁滞,唔够光猛,真系唔太中意.相信连餐具都继承咗上一手,睇得出明显地残旧.本来叫左香芉炆腩肉,但香芉卖晒,就转左做春菜炆腩肉,无咁滞都好既.全场得六个客, 大约1/5满,厨房嘅压力应该唔大,但都要等15分钟先至有得食.餐汤先到,系青红萝卜煲粟米.汤都几甜但依个唔系重点.青红萝卜厉害嘅地方系每一粒都有渣,咁我梗系预计粟米会淡而无味啦,点知系出奇地甜㖞.算系食完萝卜渣既补偿啦.食春菜煲最紧要试下佢𠮶啲汤,一口呷落去,太咸,但系咁样用嚟捞饭反而啱啱好.春菜煮到淋淋地,非常好嘅质感,虽然汤系咸咗啲,但系都冇令到春菜过咸,食落甘甘地,有啲似食芥菜嘅感觉.腩肉就可能分2批唔同时间放落煲度,有几旧非常咸,另外几旧就相当淡.而且腩肉切得太大件,切细一半就差唔多.