華記小食店

营业中

休息中

N年都唔入青衣一次，仲要第一次去到咁入，算系比较偏僻。我唔系特别钟意食车仔面，好似间间都差唔多咁，听讲呢间华记喺疫情前仲要排长龙咁夸张。因为即叫即整，所以都要等十几分钟。地方比我想像中干净，果日唔算热，吹风扇都已经好凉。我果碗车仔面净系叫韩国花菇、菜同萝卜，咁清淡应该冇乜特别。但冇谂到花菇一食落去系咁入味🤤萝卜系清甜。试咗一只黑糖烟熏鸡翼，个烟熏味好香。另外唔同嘅小食都系佢嘅卖点，佢仲有个小食排行榜，可以睇到边啲小食系比较受欢迎。个桂花蜜烧墨鱼丸个烧墨鱼味好香浓，有少少脆，爽口弹牙，桂花蜜个量系足，不过我最钟意系佢嘅寸劲猪颈肉。老板好细心，有碟系寸劲猪颈肉，本身系辣，佢话见我哋冇食辣就帮我哋走辣，上碟前将猪颈肉吸哂油，食落去系厚实，一啲都唔韧唔干，肉汁入口即融。每次上菜，老板都会嚟介绍吓小菜嘅特色。意外嘅系，我哋食完之后，佢退返10蚊俾我，因为果日猪颈肉唔算大份。不过睇得出佢系好用心经营呢间小店，几乎样样𩠌都系佢亲自主理，见佢走嚟走去又去睇火又煮小菜，呢样系食肆基本要有嘅态度同水准。