古朴年代咖啡．酒館 (已結業)

平时最钟意去cafe食嘢，可以悠闲咁放慢脚步。星期六去开大围，见到都几多人嚟呢间cafe，一行三人就入去食。呢度灯光比较暗，座位算宽敞，坐得舒服。由于唔太肚饿，我地叫左一份长通粉，小汉堡，同三杯饮品。黑松露野菌长通粉 ($68) 有丰富嘅黑松露味忌廉汁啱啱好，唔会太多或太干，几好味。小汉堡至少要叫三个，我地叫左安格斯牛肉($32)，车打芝士烟肉($22) 同水牛芝士蕃茄($22)。估唔到汉堡细细件，但系块安格斯牛肉都唔细块，而且食落有牛肉汁煮得唔干。芝士烟肉份量都算多，有几块烟肉，绝对唔吝啬。水牛芝士蕃茄不过不失。小汉堡整体唔错，亦唔太贵值得一试。夏天太热不得不叫杯凉快特饮，一人一杯共叫左三杯。焦糖朱古力卖相吸引，有浓郁嘅朱古力香，加上忌廉，感觉有啲肥，真系适合一啲喜欢饮朱古力嘅人。Rose latte带有浓浓嘅玫瑰味，而饮落latte 同玫瑰味道平均而唔会太苦或太甜。最后蓝柑薄荷梳打非常适合夏天饮，蓝色外观精美，带有薄荷味，饮落非常凉快，解喝之余影相呃like一流！