四川菜大平伙 (已結業)

朋友移民之前就已经带我品尝过呢一间米之莲推介四川菜，水准非常高。今日同男朋友路过中环，一于食过返寻味。去到就吓亲点解会围哂板？唔通？？立即上网揾一揾，发现好在只系搬咗舖，而且系行上一条斜路咁近啫。新店环境比较开掦，阳光照射到店内嘅艺术品，令艺术馆餐厅感觉更有生气。我哋叫咗set lunch B, 前菜有口水鸡同滋味冬瓜球。冬瓜球上枱嘅时候我同男朋友都好惊奇，白雪雪珍珠咁究竟会系乜嘢味道嘅呢！原来系平时嘅酸甜青瓜萝卜制法，但就换上冬瓜！冬瓜比青瓜同萝卜更加甜美入味，醒神开胃。食一件口水鸡，男朋友立即叫好！佢话未食过咁入味嘅口水鸡。鸡件完全去骨，鸡皮都做到爽脆啫喱状，出色。例汤好足料，有白菜菌类鸡蛋等等。虽然清淡，但味道就好有住家菜嘅感觉，完全冇味精。饮完汤就有三个𩠌食，芙蓉三宝，入面有三种海鲜包括虾鲍鱼片同带子，系海鲜版嘅赛螃蟹。蛋白炒得够滑，味道鲜美，分量十足，正好中和下另外两道菜既辣度。招牌大千鸡球，一睇就知道非常惹味，尖椒麻椒落得重手，够晒刺激。鸡球大大件，内里保持juicy。干扁四季豆炒得够香又够辣，重点系两味𩠌都唔会太过油，食到最尾碟上面都唔会有一大碟油嘅出现！师傅控制得非常好