民華餐廳 (已結業)

琴日星期六同老公猪去行山，做运动前嚟到呢间新开嘅茶餐厅医肚。食lunch时段全场满座，铺面光猛，整洁企理，坐得舒服，员工态度不错。我叫咗常餐鲜茄牛肉通粉，通粉大大碗，个汤超浓，有大大粒番茄同牛肉，真系好好味，绝对系有诚意之作。个餐配埋厚多士加炒蛋加肠仔，厚多士好脆，炒蛋好滑，包埋杯热奶茶都只系$38 ，可以话系平靓正。之后如果想食常餐，都一定会谂起帮衬民华！老公猪就拣咗咖喱牛腩饭，我试咗少少。个咖喱好香又唔太辣，好开胃，用嚟捞饭一流。牛腩入边仲有我至爱嘅牛筋，老公猪让左件牛筋俾我食，好腍好入味，之后先发现原来仲有一至两件牛筋，牛腩都有几件，绝不马虎！食到一半先留意到原来呢间茶餐厅仲有中式点心同蒸饭卖，既然黎到我忍唔住要叫多个排骨饭两个人分黎试吓， 20几蚊响边度揾！排骨汁入咗啲饭度好香，又唔似啲酒楼咁油，排骨肥瘦适中，系有水准之作！我同老公猪都好喜欢去茶餐厅，呢间茶餐厅可以话系我心目中头几位嘅餐厅，佢嘅食物质素属高水平，环境卫生舒适，员工态度有礼，上餐亦很快，价钱比想像中便宜，之后一定会再嚟帮衬！