Zecond (已結業)

帮衬完先知上环有间咁好食嘅Cafe两层楼嘅格局细细地，好宁静，好舒适～配合埋舖头灯嘅装饰，令到餐厅有少少情调～一碗牛肝菌汤已经令我对呢间餐厅留下好印象，已经好期待之后嘅主菜！佢碗汤有好浓烈菌嘅味道，而且唔会水份太稀同时唔会太杰，所以烹调嘅份量与时间都拿捏得刚好。好满足感饮晒成碗而且唔会觉得好滞，反而好开胃！主菜叫咗一碟海鲜意粉，同平时Cafe食开𠮶啲唔同，佢系XO酱大虾意大利面。卖相已经见到好足料，足足有四粒大虾，而且仲有好多碎虾仔，其实系XO酱嘅馅，所以食落去有少少辣，超级野味！见到佢用咗虾仔去炒XO酱令到味道更加突出！只要系食得少少辣嘅人都会抵挡唔住，吸引我食晒全部！虽然意粉有啲少少碎，但系见到佢有切粒咁配搭左唔同嘅配料，例如蕃茄、洋葱、青椒所以感受到佢有花心思去烹调。加上配合埋一杯咁清嘅苹果汁，饮完落去带有甜甜嘅清香，令到成餐都唔会太肥腻。整体黎讲，味道（酱料与配料）、份量、虾嘅质素都好唔错，无谂过一间唔显眼嘅Cafe咁好食，值得多啲人知道！