Bigger Burger Cafe (已結業)

我唔係經常黎佐敦搵食，不過朋友約我喺附近交收，順便想食個晚飯，本來就去好出名嘅澳牛，去到門口見到排長龍同埋店員嘅服務態度，我哋決定過對面食漢堡包。門面光鮮搶眼，Menu就喺門口睇得一清二楚，價錢合理，食物又好似幾吸引咁喎！一於試吓新野啦！我好喜歡牆上面嘅壁畫，好吸引嘅美食地圖，先叫個小食等下先，一邊食雞翼一邊同朋友傾計。香草蜜糖雞翼 $68/6隻，用木板上才枱夠晒認真，雞翼皮脆肉嫩又多汁，加上少少蜜糖味道更加甜美。經典的龍蝦意大利飯 $188。好味嘅食物真係請耐心等候，全部都係新鮮製作，我哋一邊食一邊傾唔經唔覺，終於等到龍蝦意大利飯，原隻龍蝦上枱，真係眼前一亮，相機食先。顏色鮮艷，肉質彈牙，味道恰到好處。唔好以為意大利飯剩係得汁呀！原來都有啲海鮮同埋菇於飯裏面，食落更加豐富有層次，一個人食可能會太滿足，兩個人食都夠飽，私心推介！我仲叫咗杯柚子桂花茶，花茶香味四溢，可以清去油膩感，清新健康的飲食觀念。最後要食返件藍莓芝士餅 $42，作為今晚完美嘅句號，味道果然係特濃呢！食到我舔舔脷。下次嚟佐敦又多一個地方聚腳啦！