NN Coffee

营业中

休息中

餐厅以木色系设计为主，采光度高，在餐厅内进餐感觉舒适温暖。餐牌设计精致美观，见到美食图片已经胃口大增，要花一点时间先可决定食咩。久丸小山园团子黑糖抹茶牛奶一上枱已经吸引眼球，抹茶粉，抹茶牛奶，一层一层咁，好靓，茶味奶味平均。至于最底有一层黑糖，可以因应个人喜好，拌匀黑糖，以调校甜味，真系好贴心。自家制蜜渍柠檬梳打蜜糖味同柠檬味比例啱啱好，感觉好清新。照烧鸡扒伴饭团开头以为饭团好普通，但原来唔系，暖暖嘅饭团加埋饭素，入口特别香。鸡扒煎得香脆，唔会油淋淋，赞。日式矶煮时令鲍鱼月见荞麦面摆盘十分精致，一上枱已经心心眼了。荞麦面面质滑溜，沾上铿鱼汁更系停唔到口。鲍鱼鲜嫩弹牙，萝卜又淋又无渣，2个都好入味，真系睇得又食得。💯威士忌法式焦糖炖蛋第一口，我唔系咁习惯咁强烈嘅威士忌味，于是第二口伴埋云呢拿雪糕，估唔到咁夹。雪糕中和左酒味，口腔内先系蛋香，再黎淡淡嘅酒香，系有惊喜嘅甜品。环境舒适写意，食物美味可口，绝对值得bookmark再来。