譚仔雲南米線 (已結業)

上星期五晚, 师傅放左监就出左旺角, 最主要系帮培哥搅下宽频, 结果当然系搅到一身大汗同埋好鬼肚饿啦, 但一支公又唔知食咩好? 兜左好耐最后师傅都系想食米线, 但素来师傅都觉得旺角冇出色嘅米线店, 就如佐敦冇出色嘅车仔面一样, 所以都唔知去边间好?师傅喺冇咩选择下加上米线大过天嘅情况低下, 唯有屈就一下, 见到呢间食店都焗住要食啦; 其实师傅最唔钟意呢间食店嘅系食辣都要加钱, 虽然一蚊鸡已经唔系咩钱, 但硬系觉得冇道理; 呢个情况就等如食云吞面落浙醋, 食寿司加wasabi, 所以绝对冇理由啰! 不过既然要食唯有比啦, 于是师傅柯打左牛肉, 墨鱼丸同埋炸酱配酸辣汤底, 再加多杯冻柠茶!等左一阵, 酸辣米线就摆左喺师傅面前, 于是第一时间试下个酸辣汤底, 酸辣汤底系酸酸地微微辣, 几开胃仲会追住饮, 呢下都几过瘾, 味道唔错; 再试下牛肉, 牛肉未算好老, 但几韧而且有根, 牛肉水准都算差, 所以唔算好味; 而墨鱼丸有三粒, 入口都几爽口, 加上墨鱼丸有墨鱼味, 颇香,算唔错; 至于炸酱少少辣, 呼道尚算抢口, 不错啦; 而配菜有腐皮芽菜, 芽菜爽口, 份量又多, 腐皮就好香, 好入味;