桃園制作粥麵餐廳 (廣田商場) (已結業)

开张日试完果个失败嘅早餐之后，我听咗我妹话呢度D小炒好OK，于是乎我又嚟试多次，今次拣咗午市时段。新舖开张期内，座无虚席，近乎必然。但系假如D嘢食唔OK，就会系刹那光辉不代表永恒。呢个饭还算食得吓，奈何店舖所在系屋村区，收人近四十蚊个饭，D鸡翼点能够整到干憎憎呢？屋村街坊钱唔易赚而且有要求呢！面质未见出色，洒咗一堆疑似虾子物体，但系我食唔到有虾子味。最抵打系猪手，以价钱嚟讲我觉得份量对得住街坊，但系好遗憾猪脚趾之间嘅毛未清理得干净，虽然够稔，但系南乳味唔出，如果可以畀番多少心机清干净D毛呢，我都会考虑再帮衬嘅。试过呢度D即磨咖啡苦夹涩之后，都系叫冻奶茶稳阵，而亦确实，呢杯冻奶茶合格。写食评总系有单有据先嚟得有根有据。纵然我自己短期内肯定唔会再帮衬，但系上传餐牌方便人哋，有头有尾，我觉得系应该。