影片
更多
2011-10-07
74 浏览
今日有高人指路，带咗我哋去中环万花红食午饭。万花红位于中环卑利街，如果唔熟悉中环，都几难揾；其实沿著荷李活道向东行，过咗伊利近街，见到𠮶间旧式凉茶舖---公利真料竹蔗水，转右𠮶条上斜嘅掘头巷，就系卑利街，万花红就系你嘅左手边，如果你沿荷李活道继续行，见到GOD嘅话，就表示你已经行过咗啦。行到门口，只见一间落地玻璃嘅舖仔，玻璃上面贴满唔同食物嘅宣传海报，上面有一个橙色嘅灯箱招牌，门口则放咗两张细圆枱；步入去舖面，楼面呈L形，摆满都只系八张圆枱，一间街坊小炒嘅格局；而系厨房门口嘅角落，就有一座热水炉，隔离摆咗两行茶壶，下面则放咗几”箱”茶叶，原来万花红除咗小炒外，仲有茶市点心供应。呢间舖仔，左睇右睇，都唔似有三十几年历史，冇莲香楼嘅金漆招牌和点心车，亦冇陆羽茶室古色古香嘅装修格局，顶多都系得十年、八年光景，返屋企上网揾吓资料，才知道万花红早于1977年已经系中环开业，先系摆花街开舖，及后因拆楼重建关系，就搬到荷李活道，后又因加租关系，再搬到现址卑利街；原来系七、八十年代，万花红跟莲香楼和陆羽齐名，系中环，冇人不识；如今，三间茶楼都依然屹立不倒，但就各走各路线。今日系假期，下午1:30，都唔
万花红位于中环卑利街，如果唔熟悉中环，都几难揾；其实沿著荷李活道向东行，过咗伊利近街，见到𠮶间旧式凉茶舖---公利真料竹蔗水，转右𠮶条上斜嘅掘头巷，就系卑利街，万花红就系你嘅左手边，如果你沿荷李活道继续行，见到GOD嘅话，就表示你已经行过咗啦。
行到门口，只见一间落地玻璃嘅舖仔，玻璃上面贴满唔同食物嘅宣传海报，上面有一个橙色嘅灯箱招牌，门口则放咗两张细圆枱；步入去舖面，楼面呈L形，摆满都只系八张圆枱，一间街坊小炒嘅格局；而系厨房门口嘅角落，就有一座热水炉，隔离摆咗两行茶壶，下面则放咗几”箱”茶叶，原来万花红除咗小炒外，仲有茶市点心供应。
呢间舖仔，左睇右睇，都唔似有三十几年历史，冇莲香楼嘅金漆招牌和点心车，亦冇陆羽茶室古色古香嘅装修格局，顶多都系得十年、八年光景，返屋企上网揾吓资料，才知道万花红早于1977年已经系中环开业，先系摆花街开舖，及后因拆楼重建关系，就搬到荷李活道，后又因加租关系，再搬到现址卑利街；原来系七、八十年代，万花红跟莲香楼和陆羽齐名，系中环，冇人不识；如今，三间茶楼都依然屹立不倒，但就各走各路线。今日系假期，下午1:30，都唔系好多人，我们就占用咗一张中枱；环顾四周墙上嘅宣传海报，除咗一般小菜外，最吸引嘅，系羊腩煲和蛇羹；但食午饭时间，未有胃口食羊腩煲，只系叫咗个例牌蛇羹$298，再点了榄菜肉崧四季豆$55、虾酱通菜牛肉$58及炸子鸡半只$118，可惜伙计说炸子鸡未准备好，我哋就只好转叫香煎莲藕饼$55，再加几笼点心。
伙计落单后，将食物记录咭放返我哋枱上，骤眼一看，系记录咭嘅背后，写有几行字，应该系我们点了的菜式，随手拿来一看，字体秀丽，轻重有序，系现今科技发达嘅社会里，要写得一手好字已经唔多，仲要系出自一位茶楼伙计嘅手笔，就更加难得，值得欣赏。
再望吓对筷子，虽然唔系什么象牙筷子，但系从筷子嘅颜色，已可知万花楼嘅历史不浅，而且系筷子上面，仲用红字刻有”万花红酒家”字样，如今，已经好少见。
茶，香片，茶色清澈，略带淡淡嘅甘绿色，可惜香味欠奉，入喉亦冇余香，非靓茶叶。呷咗啖茶，伙计就揣上一个石油气炉及一碗卜卜脆、菊花和柠檬叶，我随手就拿起一小块卜卜脆食，果然脆，绝对唔会摆到腍哂，亦唔油腻，几好食；不一会，𠮶蛇羹就出场啦，一个不锈钢锅上，唔系一般嘅砂锅，唔知有冇特别嘅原因，可能比较传热啩；𠮶不锈钢锅睇落唔系好深，但系我哋四个人，每人都分到两碗，平均每碗都只需$37.25，非常抵食。
先讲卖相，唔太吸引，汤底呈瘀啡色，唔够光泽，材料有蛇丝、肉丝、木耳等等，唔记得有冇冬菇丝，但刀功略嫌粗疏，有部份食材切得未够”丝”；至于味道，鲜甜，味浓，唔错，而且稀杰程度适中，加入菊花和柠檬叶，更能带出蛇羹嘅香甜，食完头轮，我哋仲要求伙计为我哋添加柠檬叶，准备第二碗。
点心未来，先上两碟菜，虾酱通菜牛肉，未食，已经闻到一阵浓郁嘅虾酱味，非常香，很吸引，夹了一口通菜，够火喉，唔老，爽口，有虾酱味，但唔会太咸，唔错，再夹一口牛肉，味道亦唔错，但肉质略韧，普普通通。
至于榄菜肉崧四季豆，卖相麻麻，好多黑色点点，好似焦焦哋，夹了一口，但系毫无焦味，反而几香口，唔系干炒，所以有少许油，但油份量唔过份，唔油腻，肉崧份量亦唔少，对于喜欢食肉嘅我，绝对合适。
跟著，系香煎莲藕饼，一揣上枱，觉得有一股热气涌出来，绝对系刚刚煎起上碟，但卖相麻麻哋，一块一块大小相近，但形状三尖八角，再者，莲藕饼煎得干身，但好似煎得有点过火，表面好似焦焦哋，尝了一口，完全改观了，体验到”人不可以貌相”嘅道理，虽然表面焦焦哋，但咬落去，一丁点焦味都没有，反而系外脆内爽，莲藕饼嘅表面系干得有道理，脆脆的，入面则味道丰溢，绝对保存到莲藕嘅香味，亦有爽口嘅咬感，比莲香楼更出色。
再来系几笼点心，万花红嘅做法，同坊间嘅点心舖一样，即叫即蒸，并唔系一般大茶楼嘅做法，一批一批咁蒸出来，所以比较需时。
虾饺都几大只，皮都算簿，虾肉爽口，新鲜，唔错；烧卖都算大粒，但猪肉份量比虾多，有肉味，但唔够爽口，相比之下，我喜欢虾饺多d。
最后仲有马拉糕和奶皇马拉卷，马拉糕绝对又系一传统美食，热腾腾，香味扑鼻，颜色偏深色，未食，都知道系用黑糖做，一啖咬落去，非常松软，但味道偏甜，可能系黑糖嘅关系，味道比较浓、比较甜；至于奶皇马拉卷，味道比马拉糕淡，质地不及马拉糕松化，而且奶皇味不足，比较差。
埋单$560，平均每人$140，其实最贵都系𠮶蛇羹，若果剔除𠮶蛇羹，每人唔驶$100。食过万花红几个小菜和点心，觉得万花红嘅火喉了得，有镬气，味道亦系传统嘅做法，比较重手，比较浓味，绝对系一间值得保存下去嘅传统茶楼，唯菜色嘅卖相和茶叶嘅质素，应该可以提升一吓；但以咁嘅价钱，可以食到呢d传统美食，都算抵食。
张贴
