一心素食 (已結業)

妈妈同婆婆话呢排唔太健康，要食下斋清清佢，我就揾左观塘一间都几多人食既平民斋舖同佢地一齐食。一行4个人叫左个4人套餐，先500几蚊超级抵，7𩠌1汤，食到一半已经好饱打包左劲多野走。姬松茸豆腐汤素翅d素翅好逼真，爽口弹牙，松茸汤好浓郁，有d似酸辣汤但唔辣，饮完个汤饱左1/3。汤饺里面有木耳面筋，做足水饺既口感，份量多大大粒。一心pizza第一次见斋舖有pizza食，个饼底创新地用左手抓饼，煎得好香脆，上面洒左d提子干，甜甜地几过瘾。东坡肉面筋中间加左2层胶质，为左模仿真正东坡3层肉既口感，食落好有层次，胶质比起真既肥膏硬身。枝竹豆腐素火腩煲枝竹煮得好入味，个煲又够保温，放好耐都系暖既，火腩同样都系面筋，炆左好耐好入味。咖哩鲜蔬素肉腩开头有d惊咖哩会伏，又唔系㖞，送饭完全一流，好有惊喜，比较偏印度既味道，够流沙。石锅杂菌茄子猴头菇石锅好保到热，去到走个刻都系滚架，茄子煮到好淋，d肉碎真既一样，完全分唔出佢系斋。一心炒饭饭炒得好干身，好够获气。