JK Kitchen (已結業)

铜锣湾嘅永光中心有好多特色餐厅，而JK Kitchen就系其中一间，听个名可能唔知原来系食越南菜嘅。餐厅环境舒适，墙身挂满越南嘅风土画，仲有部大电视，唔洗惊食食下觉得闷。侍应招呼周到又亲切，黎依度食野有种家嘅感觉~首先叫咗厨师推介嘅JK炸拼($115)，有春卷、牛油鸡翼、鱼饼、蔗虾、薯仔丝虾，每款2件。春卷皮薄馅靓，食得出落足好多材料黎包。蔗虾系用蔗黎整条棒，虾打得好实，爽口弹牙。薯仔丝虾由香脆嘅薯仔丝包住大大旧虾，外脆内软。食越南野就一定要食汤檬或者捞檬，所以仲叫咗精选生熟牛肉汤檬($78)。生牛肉系薄肥牛，上菜嘅时候系见到红红地嘅，一浸落汤到就熟哂，可以睇得出系超薄。熟牛肉系厚身啲嘅。两款牛肉都好重牛肉味，又软又入味。最后送咗甜品大菜糕，上面淋咗花奶，而入面嘅蛋花好有纹理，系好有特色嘅大菜糕。而晚市每位顾客嘅首杯饮品系半价，我地就叫咗珍珠奶茶同青柠梳打。