芭堤雅小廚

营业中

休息中

同鄰居放假冇嘢做，就踩單車過嚟近近地食個晏。大美督其實有好多選擇，但係好耐冇食過呢間。門口侍應，好鬼合作，叫我哋拍好啲單車喺餐廳側邊，咁就二話不說入咗呢一間。12:00入到去已經全場爆滿，睇睇個餐牌午餐選擇唔算多，但係都揀到想食嘅。各有各嗌啦，口痕之下，再加多咗個大拼盤。嘢食嚟到嘅時候，鄰居又好好俾我讓人試啲。個海南雞飯，油飯比我想像中乾身，但雞總算滑。咁就攞咗另外一個鄰居啲咖喱牛腩撈一撈個油飯。個咖喱真係相當出色，椰香味十足，個牛腩都炆得好腍。到我自己嗌個豬手飯黎啦，望落去個汁比較多，都驚有少少服服地，始終好耐冇嚟過食，唔知水準有冇改變。但係食落去出奇地入味又淋滑，$65嚟講真係抵到爆。跟住個大拼盤嚟啦，其實都飽左大半，咁都唔可以嘥嘢。樣樣都水準表現得平均，但係就覺得佢個魚餅有少少偏腍。食飽之後罪惡感倍升，消脂變增磅之旅，但係好食真係大晒嘅。其實自己好鍾意食肉碎煎蛋飯，下次一定要試埋佢。