影片
更多
2017-04-19
4661 浏览
真系长江后浪推前浪！今晚由我一个小师妹带我哋去食中菜，呢位小师妹今年系港大法律系读最后一年，叫佢做小师妹令我自己感觉后生哂，师兄师妹嘛，其实计年纪我真系做得佢阿爸，谂起都吓亲，有啲接受唔到，哈哈。通常带人去食饭，都会拣啲装修靓靓哋，网上好多人推介嘅餐厅，免出事嘛。但我呢个小师妹艺高人胆大，拣咗一间系西营盘嘅地道小店，装修简陋，openrice得几张相，几个食评弹多个赞，最重要系佢自己都冇嚟过，冇食过，点解咁有信心？真系估佢唔到。呢间小店叫「兄弟记」，位于西营盘皇后大道西210号，即系老牌Sammy's Kitchen过两个舖位。食过之后，一致裁定：兄弟记好掂，劲好食，直头系惊喜发现，以后一定多啲嚟帮衬。兄弟记呢三样嘢最出色： 新鲜、调味、火候。 我哋试过椒盐鲜鱿，姜葱田鸡，火腩大鳝， 呢几样嘢个料新唔新鲜一食就知，冇得呃。就算叫个炸云吞，睇住佢即刻现场包好然后拎入厨房炸。 大厨嘅味觉仲系好sharp，所以啲调味做得好靓。最重要系个火候，呢度镬气一定够，但系无过火，厨师拿捏个火候非常精准，𩠌菜系佢最佳嘅状态时候就收火上碟，点会唔热辣辣，点会唔好食。其实我一踏入兄弟记，就有啲似曾相识嘅感觉
今晚由我一个小师妹带我哋去食中菜，呢位小师妹今年系港大法律系读最后一年，叫佢做小师妹令我自己感觉后生哂，师兄师妹嘛，其实计年纪我真系做得佢阿爸，谂起都吓亲，有啲接受唔到，哈哈。
通常带人去食饭，都会拣啲装修靓靓哋，网上好多人推介嘅餐厅，免出事嘛。但我呢个小师妹艺高人胆大，拣咗一间系西营盘嘅地道小店，装修简陋，openrice得几张相，几个食评弹多个赞，最重要系佢自己都冇嚟过，冇食过，点解咁有信心？真系估佢唔到。
呢间小店叫「兄弟记」，位于西营盘皇后大道西210号，即系老牌Sammy's Kitchen过两个舖位。食过之后，一致裁定：兄弟记好掂，劲好食，直头系惊喜发现，以后一定多啲嚟帮衬。
兄弟记呢三样嘢最出色： 新鲜、调味、火候。 我哋试过椒盐鲜鱿，姜葱田鸡，火腩大鳝， 呢几样嘢个料新唔新鲜一食就知，冇得呃。就算叫个炸云吞，睇住佢即刻现场包好然后拎入厨房炸。 大厨嘅味觉仲系好sharp，所以啲调味做得好靓。最重要系个火候，呢度镬气一定够，但系无过火，厨师拿捏个火候非常精准，𩠌菜系佢最佳嘅状态时候就收火上碟，点会唔热辣辣，点会唔好食。
其实我一踏入兄弟记，就有啲似曾相识嘅感觉， 见到老板娘终于忍唔住问佢：「我细个成日食东边街街口𠮶间“镛记”，有间“兄弟记”好似喺附近，我都有食吓，你地系唔系同一间兄弟记？」 老板娘听见我识得讲镛记，就知我不是省油的灯，哈哈！呢间已消失的镛记唔同中环食烧鹅𠮶间，不过名字就一样。谂番起以前镛记啲小炒真系一流，印象中炒桂花翅靓到不得了，以前就算啲小店厨师功力都有番咁上下。
老板娘开始对我呢位「老」顾客有啲兴趣：「系呀，我哋兄弟记开咗六十几年啦，以前个铺位喺现在“西埔”𠮶度，由我老爷做起，而家我老公接手，又几十年啦」。原来真系老字号，几十年嘅功力，唔怪得出品咁好啦！
「 我哋全部都用新鲜材料，田鸡都系即叫即㓥，一食就知，下次你试吓边鱼，我哋会帮你起哂骨，好好食㗎」，边鱼好似早排鼎爷喺饮食节目都有介绍过，老板娘咁讲下次又要再嚟啦。
望住呢间兄弟记有啲感触，又系一间香港小店嘅故事，老公喺厨房，老婆喺楼面，不停咁做，努力地做，咁就几十年，但系岁月没有令佢地变得求奇，对出品仍然有坚持有要求，我心生敬意。佢哋唔识搞branding，唔识消费自己嘅老字号，唔识整个懒特别嘅招牌，写住鸡乸咁大只字「自1950年」，佢哋只系用啲红色胶片咗三只字兄弟记贴喺门口就算。佢哋亦都唔识消费下啲旧香港情怀，喺舖头里面贴满哂啲黑白相，佢地实有啲老舖，老顾客相一大堆，唔够就加啲西营盘、南北行，三角码头等旧照实够啦。 佢哋更加唔识搞社交媒体，边有facebook边有网站，openrice都冇人写佢哋。米芝莲啲Inspector都唔方有机会行过佢门口，可惜。
咁点解我呢个小师妹咁慧眼识英雄，佢话系：「直觉」。系咪咁劲呀？经过一轮抽丝剥茧式嘅讨论，原来系咁：
睇下个名：叫得兄弟记呢啲名，多数都系传统派，实力有番咁上下，如果唔系好快就消失，食唔住个名。(Precedent 睇案例)
睇下个样：舖头里面的顾客大部分都系男人，仲系麻甩佬，咁啲嘢食多数都有啲保证，如果里面大部分都系女人，咁就要小心衡量。(Circumstantial Evidence 环境证据)
Openrice：不可以尽信，因为识食嘢𠮶啲「佬」多数都唔会写个食评po上网。(Hearsay Rule 闻说证供不可信)
对于呢个小师妹嘅直觉加观察力加分析能力，我绝对相信佢会系饮食界同法律界嘅明日之星，难怪佢未毕业，就已经被一间著名律师行罗致做见习律师，一毕业就可以返工。为咗悉心栽培佢，我哋决定多啲同佢食饭，为咗保护佢嘅身份，我决定唔tag佢，所以你哋估佢唔到。呢个小师妹又可能like我个post同畀comment，但你哋都系估佢唔到，睇佢唔到，哈哈！😂😂💓💓😂😂
滋味鸡煲
243 浏览
0 赞好
0 留言
椒盐鲜鱿
222 浏览
0 赞好
0 留言
姜葱田鸡煲
201 浏览
0 赞好
0 留言
火腩大鳝煲
209 浏览
0 赞好
0 留言
炸云吞
142 浏览
0 赞好
0 留言
张贴
