白鬚旗艦店 (已搬遷) 新店位置

西貢做完嘢，熱辣辣，想搵間坐得舒服嘅食嘢，於是就嚟咗呢度。雖然主打印尼食物，但係餐廳嘅裝潢同格局更似一間 cafe，窗明几潔，令人感覺舒服。原本想試牛骨湯飯同牛丸，但係可能嚟得晏咗，兩樣都售罄🥺，於是就揀咗個印尼雞湯飯。我承認揀呢個係畀塊印尼蝦片吸引咗😂，所以食物上枱時，第一時間就將佢幹掉，蝦片脆卜卜，好正。試一啖湯，湯底偏淡口，不過椰奶，香葉同香茅味好重，加埋青檸汁，係我鍾意嘅味道，撈飯食一流。除咗雞肉外，湯入面仲有雞蛋，豆卜，芽菜等，材料算豐富，食哂成碗白飯同餸，非常飽。嚟多杯椰奶咖啡，底層 cold brew 咖啡偏濃，配合上層厚厚嘅椰奶，剛剛好，唔苦，亦唔太甜，係椰汁味同咖啡味 balance 得唔錯嘅一杯飲品。