竹串日本料理 (已結業)

刚刚去完日本一转，返港虽只有两天，但味蕾仍挂念著上机前喺黑门市场食o既刺身早餐，今日终于忍唔住又想食鱼生，结果当然系孖会计小姐去觅食啦！二人就凭之前喺街上接收到o既传单，决定一试可享八八折优惠o既「竹串日本料理」。餐店内外o既装备都用木为主材，感觉干爽企理。店子右方有个寿司吧。最舒适应该系贴墙o既四人皮櫈卡位。因午饭时间仅有一小时，两口子早已喺网上查阅过午市餐牌，埋位即点选咗两客丼丼。两款丼物套餐均附上沙律、味噌汤、小食及甜品。沙律：薯仔沙律清凉爽脆，极易入口。小食：海蜇爽润惹味，微辣醒胃。极上鱼生饭（$98）：大大碗o既鱼生饭含带子、牡丹虾、三文鱼、吞拿鱼、油甘鱼及海胆，十分丰富。丼物o既鱼生饭底粒粒饱满，大大只带子白滑幼嫩。油甘鱼爽厚肥美。三文鱼柔润鲜甜。牡丹虾爽甜润滑。海胆则香浓滑溜。每样食材都一样咁鲜香美味， $98绝对抵食。会计小姐最爱食鱼，鳗鱼更系佢「飞佛」，所以就点咗客「极上鳗鱼丼饭」。XO仔一向怕骨唔敢食鱼，何况系咁多细骨o既鳗鱼呢？！原条长长o既鳗鱼实在震撼，结果细佬都系忍唔到手要俾自己部手机先食。