Godiva Chocolatier (已結業)

Godiva都公认为城中数一数二出名而高质素嘅朱古力店，真喺好多谢朋友咁重手赠小弟一盒「Assorted Truffles with Gold Star Box」（杂锦松露朱古力星形礼盒），包装小巧可爱，氹人欢喜嘅好选择之一 。「杂锦」二字未免有少少夸大，查实只有两款味道，盒面已注明有牛奶朱古力及黑朱古力 ，数量上盒背有写共10粒，不过，打开包装，又竟然唔喺一样一半，小弟依盒就只有4粒黑朱古力（绿纸），而牛奶朱古力（红纸）则有6粒。虽然话喺「松露朱古力」，但撕开包装纸单睇表面，个人已觉得唔可以称之为松露朱古力，朱古力表面光滑𫞠身，跟平时所食到嘅形状不规则、又有层粉粉哋面嘅松露朱古力绝对喺两回事 。切开朱古力粒，内里填满嘅朱古力浆，浓郁香甜，滑不溜口，而黑朱古力及牛奶朱古力分别只在于外层，前者可可味浓郁，细尝有点微甘；后者朱古力口感幼滑，稍甜而未过火。虽然啲朱古力跟名称有颇明显嘅出入，不过，Godiva嘅出品始终都喺有质素嘅，所以，用嚟送礼都喺显得较大体啲 。