大喜慶魚翅酒家 (已結業)

自从大喜庆搬到现址都未帮衬过，以前旧舖反而拉衫尾来食过两三次鱼翅。今日同个行家来饮茶，呢度下昼都几多人，听个行家讲系因为D点心平左的关系，佢系熟客所以好快有位。两个人叫左六个点心：鸡球大包几大同足料，系我至喜爱的广东点心之一，可惜唔系间间酒楼有得卖；煎粉果亦不错，外皮脆入面仍保持湿软，浸上汤吃仍脆口，有水准；蕃薯枣比一般春卷有特色，香口又好味道；柚皮蒸排骨中的柚皮好食过排骨，这里的柚皮无苦味，略油腻但好味；芝麻糕有芝麻味又有椰汁味，平衡番其他油腻的点心，几正；金钱鸡卷又系另一个我的至爱，浸了玫瑰露的肥猪肉加鸡肝，简直是人间美味。可惜而家无咩人识食和敢食，所以都好少地方有得卖，好似只有老店如莲香、得龙、大荣华同呢度有。其实点解九唔搭八的煎鹅/鸭肝都敢食，但呢味传统广东点心又唔敢食呢？真奇怪。同金钱鸡齐名天下的当然是金银润，不过有得卖的地方就更少。最后叫了碟叉烧虾膏炒饭，叉烧是肥叉，好香口好正。埋单二百蚊有找，感觉系平左好多，点心食物水准都不俗，物有所值。题外话：临走见有雷射商标大闸蟹，价钱相宜，虽近水尾，但搞多餐蟹宴都好㖞！