Delight (已結業)

屋企附近呢间Delight，只听闻唔好味，今日亲身试。要咗Classic Egg Benedict餐$78，latte加$10。Poached eggs其中一只熟咗啲唔够流心，另一只就好流。蛋黄味道算香浓，但隐约有微微腥味，明显系蛋源问题。配合底下的咸香烟肉、软熟菠菜、香脆的英式松饼，荷兰汁份量刚好，classic style嚟讲唔够柠檬、牛油香但buttery质地，整体味道都唔错，惊喜就冇乜。伴碟意大利醋沙律菜调味几好，食完两只漏蛋，再食呢个就觉得清咗喉咙腻感。Latte后上，嚟咗冇几耐我仲食紧主食已即刻饮咗清水试咗啖，咖啡底带微酸可接受，奶味唔够重，泡有啲粗。果然食完份餐，放咗约10分钟，啲泡已散同塌。但睇杂志、食评介绍话店主拎咗好多咖啡cert、比赛得奖又做评判之类，饮完又唔觉咁劲。不过响呢区，我暂时又揾唔到有边间整呢类早餐仲好啲。