巴依餐廳

营业中

休息中

位于水街尾嘅巴依餐厅喺西环有一段日子，事关我喺佢啱啱开业嘅时候已经对佢饶有兴趣，但碍于各种终于，等咗好多年终于有得拜访。🙈记得旧时餐厅门口未系咁人声鼎沸，喺攞咗好多年米芝莲推荐同埋得到蔡生赞赏之后，依家要食，最好就提早一个礼拜左右book喇！Book位嘅时候职员会问你使唔使留羊腿——冇食过呢度嘅烤羊腿就唔好话自己嚟过食巴依啦，所以梗系老虎蟹都留啦🙏🏻🙏🏻当晚我只有两位，所以有好多嘢都未有机会试。但系尽我（肚量）所能，试咗烤羊腿、苞菜、清炖羊肉汤、家常拌面、酸奶、杏仁羊奶冻，都系有赞无弹。烤羊腿羊皮硬脆，颇有食曲奇饼嘅口感；羊肉十分嫩滑，羊膻味刚刚好，唔会太重但仍有风味，点埋啲孜然粉真系好味到会升仙，不过两个人食真系食唔晒，如果大家多啲人食会好啲。干煸苞菜有川菜风味，少有香港餐厅做到呢种感觉。有辣椒香气、微呛但不辣喉。清炖羊肉汤，汤头清，羊膻味偏重，我个人喜欢呢个口味。家常拌面稍显普通。酸奶口感较稠唔太抗拒杏仁露味道嘅朋友都可以试试杏仁羊奶冻，杏仁味较出，唔系太多「羊奶」嘅味道，口感顺滑。